Në një kohë kur fëmijët kalojnë gjithnjë e më shumë orë para ekranit, sporti po rikthehet si një nga faktorët më të rëndësishëm që ndikon pozitivisht në zhvillimin akademik. Studime të shumta në vende të ndryshme tregojnë se fëmijët që ushtrojnë rregullisht aktivitet fizik janë jo vetëm më të shëndetshëm, por edhe më të suksesshëm në shkollë.
Lëvizja duket se është një aleat i fuqishëm i trurit. Ekspertët e edukimit fizik dhe psikologët theksojnë se aktiviteti sportiv përmirëson përqendrimin, kujtesën dhe aftësinë e fëmijëve për të menaxhuar kohën. Pas një ore trajnimi, fëmijët kthehen më të çliruar, më të fokusuar dhe të gatshëm për të mësuar.
Për shumë prej tyre, sporti shërben si “ventil emocional”, duke larguar stresin që mund të grumbullohet gjatë ditës shkollore. Mësuesit vërejnë një dallim të qartë mes fëmijëve aktivë dhe atyre sedentare. Fëmijët që frekuentojnë sporte si futboll, basketboll, atletikë apo not shfaqin më shumë disiplinë dhe përgjegjësi. Vetë regjimi i stërvitjeve i mëson ata të jenë të organizuar, të ndjekin rregulla dhe të përqendrohen në qëllime konkrete, cilësi që reflektohen edhe në procesin e të nxënit.
Një tjetër faktor i rëndësishëm është vetëbesimi. Fëmijët që ndihen të aftë në një sport kanë më shumë besim edhe në aftësitë e tyre akademike. Sukseset në fushën e sportit, qoftë edhe të vogla, krijojnë një ndjenjë motivimi që i ndihmon të përballojnë me më shumë kurajë sfidat e shkollës. Përveç kësaj, sporti i mëson fëmijët të punojnë në grup dhe të komunikojnë më mirë, aftësi që ndikojnë drejtpërdrejt në sjelljen e tyre në klasë. Prindërit gjithashtu vërejnë se fëmijët që merren me sport kanë një orar më të rregullt.
Ata mësojnë të menaxhojnë kohën midis detyrave të shtëpisë, stërvitjeve dhe aktiviteteve të tjera. Ndryshe nga perceptimi i gabuar se sporti “i merr kohën mësimeve”, duket se ndodh e kundërta: fëmijët aktivë mësojnë të jenë më efikasë dhe arrijnë rezultate më të mira. Në një kohë kur jeta sedentare po rritet, sporti është një nevojë, jo thjesht një zgjedhje.
Ai ndihmon trupin, forcon mendjen dhe krijon fëmijë më të lumtur, më të balancuar dhe më të suksesshëm. Shkollat dhe familjet që e kuptojnë rëndësinë e tij po investojnë gjithnjë e më shumë në programe sportive, duke e parë fare qartë se çdo orë e kaluar në lëvizje kthehet në përfitim edhe në bankat e shkollës. Në fund të ditës, mesazhi është i thjeshtë: fëmijët që lëvizin mësojnë më mirë. Sporti nuk është zbavitje, është pjesë e formimit të tyre.